GIRLS DAY: Сұлулық, сенім, сәттілік!

Көктемнің алғашқы айы – табиғаттың оянып, жер жаһанның жасарып, жаңа тыныс алатын кезеңі. Дәл осы әсем шақта, арнайы кітапханада қазақ қыздарының асыл болмысын ұлықтаған, өнер мен руханиятты тоғыстырған ұмытылмас кеш болып өтті.

Кештің шымылдығы ұлттық әуезбен түрілді. Қасиетті қара домбыраның күмбірлеген үні жанды тербеп, өткеннің үнімен бүгінді жалғағандай әсер қалдырды. Бұл кеште қаламыздың өнерпаз жастарының әсем әндері әуелеп, көрермен көңілін тербетіп, жүректерге жылылық ұялатты, көктемнің шуағындай мерекенің көркін қыздыра түсті.

Кеш барысында ән мен би, ойындар мен көңілді қойылымдар орын алып, қатысушылар караокеде ана туралы әндер орындады. Ал думанды кештің сәні мен мәні – марапаттау рәсімі болды. Өмірін руханият пен білімге, қоғамның өркендеуіне арнаған арулар құрметке бөленіп, гүл шоқтары мен сыйлықтарға ие болды.

«Ана – өмірдің шырағы, қыз – ұлттың жаны» деген сөз бар. Осы кеште дәл осы сөздің мән-мағынасы айқын көрініс тапты. Сыйластық пен жылулыққа, ән мен күйге, шаттық пен шынайы қуанышқа толы бұл кеш әр жүректе ұзақ сақталары анық.

ӨЗГЕРІС ӨЗІҢНЕН БАСТАЛАДЫ!

Мотивациялық кеш

Қазіргі заман – даму мен үздіксіз ізденістің дәуірі. Ұлттық құндылықтарды сақтау мен жаңашылдықты ұштастыру – бүгінгі қоғамның басты міндеттерінің бірі. Осындай асыл мұраттарды негізге ала отырып, арнайы кітапханада “Өзгеріс өзіңнен басталады!” атты мотивациялық кеш өтті.

Арнайы кітапхана – рухани кемелдену мен білімнің ордасы

Арнайы кітапхана – тек білім орталығы ғана емес, ұлттық руханият пен инновацияның ұштасқан мекені. Бұл мекеме қазақ әдебиетінің алтын қазынасын сақтап қана қоймай, оқырмандарының рухани өсуіне, тұлғалық дамуына ерекше көңіл бөледі.

Кештің мақсаты және мазмұны

Бұл мотивациялық кештің басты мақсаты – жастарға рухани және тұлғалық даму, өзін-өзі жетілдіру, білімге ұмтылу және өмірге деген сенімді көзқарас қалыптастыру жайлы ой салу.

Іс-шара барысында әртүрлі сала мамандары сөз сөйлеп, жастарға өздерінің өмірлік тәжірибелерін жеткізіп, табысқа жетудің жолдарын көрсетті.

Ізгі тілек

Әрбір жас ұрпақтың бойында білімге, жаңашылдыққа, ұлттық рух пен рухани кемелденуге деген құштарлық арта берсін. Өзгерісті өзіңізден бастап, қоғамға, еліңізге, болашағыңызға жарқын із қалдыруға ұмтылыңыз!

Білімді, еңбекқор, ізденімпаз болыңыздар – өйткені келешек сіздердің қолдарыңызда!

СЕГІЗ ҚЫРЛЫ, БІР СЫРЛЫ ТҰЛҒА: Кендебай Қарабдалов арнайы кітапхана оқырмандарымен кездесті

Бүгін  арнайы кітапханамызда қазақтың мәдениеті мен руханиятына өлшеусіз үлес қосқан белгілі этнодизайнер, музыкант, тарихшы, фарабитанушы Кендебай Қарабдалов зағип оқырмандармен кездесіп, олармен терең әрі мәнді сұхбат құрды.

Тарихи мұра жанданған сәт

Кездесуде Кендебай Қарабдалов Отырар өркениеті, оның саздан жасалған өнер туындылары мен музыкалық аспаптары туралы қызықты мәліметтер айтты. Отырар шеберлерінің көне құмыралары мен сазсырнай аспабы жайлы әңгімесі зағип оқырмандарға тарихи мұраның құдіретін сезінуге мүмкіндік берді.

Этнодизайн – мәдениет пен өнер синтезі

Кездесуде қазақтың ою-өрнек философиясы, дәстүрлі қолөнердің мәні туралы да сөз қозғалды. Қолөнер арқылы адамзаттың сан ғасырлық ой-санасы мен эстетикалық талғамы беріледі. Зағип оқырмандар ұлттық оюларды тактильді сезіну арқылы қабылдап, олардың мағынасын зерттеу мүмкіндігіне ие болды.

Философия мен әдебиет әлемі

Кездесу барысында әл-Фараби, Абай, Шәкәрім, Мағжан Жұмабаевтың еңбектері мен олардың рухани мұрасы туралы да айтылды. Кендебай Қарабдалов ой толғаулары арқылы ұлттық философия мен мәдени мұраны заманауи көзқараспен ұштастыруға шақырды.

Сегіз қырлы, бір сырлы тұлға ретінде Кендебай Қарабдалов мәдениет, тарих, өнер, әдебиет, философия, музыка, этнография және қолөнер саласында теңдесі жоқ еңбек етіп келеді. Оның әрбір ісі қазақтың рухани байлығын сақтауға, оны кейінгі ұрпаққа жеткізуге арналған.

ТАКТИЛЬДІ КІТАПТАР ӘЛЕМІ

Шымкент қалалық көзі көрмейтін және әлсіз көретін азаматтарға арналған арнайы  кітапханасының балалар залында «Тактильді кітаптар: Оқу әлемі. Тактильді кітаптар арқылы оқу тәжірбиесін ұсыну»  тақырыбы аясында іс-шара  болып өтті. Аталған шараға қаламыздағы № 33  Көз көру функциялары ауыр және жеңіл бұзылған балаларға арналған «Ақбота» балабақшасының бүлдіршіндері  тәрбиешілерімен бірге келіп қатысты.

Балаларды тактильді кітаптармен танысуға, кітаптар арқылы қиялын ұштауға, жаңа дүниелерді үйренуге, оқу тәжірбиесін ұсыну арқылы  балалардың кітаптарға деген қызығушылығын арттыру. Балалар  тактильді кітаптарды сипап-сезу, оқи отырып, жаңа әлемдермен танысты.

Шара барысында балақайлар белсенділік танытып, әртүрлі ойындарға қызыға қатысып атсалысты. Кеш соңында ойын жеңімпаздарына тәтті сыйлықтар таратылды.

Біздің есігіміз балақайлар үшін әрдайым ашық! Келіңіздер кішкентай оқырмандар!!!

«КІТАПХАНАНЫҢ 55 ЖЫЛДЫҒЫНА АРНАЛҒАН TEAM BUILDING: БРАЙЛЬ ШРИФТІ АРҚЫЛЫ БІЛІМ МЕН КОМАНДАЛЫҚ РУХТЫ НЫҒАЙТУ»

Бұл шара арнайы кітапханамыздың 55 жылдығына орай, Брайль шрифтін үйрену мен насихаттау, қызметкерлер арасындағы командалық байланысты нығайтып, шрифттің мүмкіндіктерін кеңінен таныстыру мақсатында ұйымдастырылды.

Шараның барысы мотивациялық тренерлердің жетекшілігімен өтті. Олар кітапханашыларға мотивация беріп, кеңестермен бөлісті. Тимбилдингтің алғашқы кезеңі қатысушылардың бір-бірімен танысуына арналды.

Командалар өздерін таныстыру барысында Брайль шрифтімен өз аттары мен армандарын жазып, достық атмосферасын қалыптастырды.

Ал сенсорлық, тактильді ойындарда әр команда Брайль шрифтін пайдалана отырып, жұмбақтар шешті, сұрақтар сессиясында қатысушылар Брайль шрифті, оның тарихы мен қолдану әдістері туралы білімдерін сынады.

Командалық жылдамдық ойындары да шараның маңызды бөлігі болды. Мұнда қатысушылар шапшаңдық пен дәлдікті сынап, жеңіс үшін жарысты.

Тимбилдинг керемет достық атмосферасында өтіп, шараның соңында әріптестер келесі тимбилдингті асыға күтетіндерін айтып, осындай бірлік пен ынтымақтастықтың ұжымды жаңа деңгейге көтеретінін қуана атап өтті.