2026 жылғы 2 шілде күні сағат 11:00-де Шымкент қалалық көзі көрмейтін және әлсіз көретін азаматтарға арналған арнайы кітапханасында «Заманауи кітапхана: форумнан алынған тәжірибе» атты дөңгелек үстел өтті.

Іс-шараның мақсаты – кітапхана саласындағы заманауи үрдістер мен инновациялық тәжірибелерді талқылау, форум барысында ұсынылған озық тәжірибелерді саралау және оларды кітапхана қызметіне енгізу жолдарын қарастыру.

Шараға қалалық кітапхана басшылары мен қызметкерлері қатысып форумда көтерілген өзекті мәселелерді талқылап, кітапханалардың ақпараттық кеңістіктегі рөлі, цифрлық технологияларды тиімді пайдалану, инклюзивті қызмет көрсетуді жетілдіру, кәсіби ынтымақтастықты дамыту және оқырмандарға сапалы қызмет ұсыну бағытында пікір алмасты.

Іс-шара тәжірибе алмасуға, кітапхана мамандарының кәсіби біліктілігін арттыруға және заманауи талаптарға сай кітапхана қызметін дамытуға ықпал ететін маңызды кәсіби алаң болды.

Қазағымның қазынасы – домбыра

Бүгін 1 шілде Шымкент қалалық арнайы кітапханада ұлт мұрасы саналатын домбыра күніне орай дәстүрлі әнші, ұлағатты ұстаз, би шешендердің ізін жалғастырушы, Созақ ауданының құрметті азаматы Кенжебай Шалұлымен кездесуге арналған «Қазағымның қазынасы – домбыра» атты мерекелік кеш өтті. Кештің басты мақсаты ұлттың үні, қасиетті қара домбыраның қадірін арттырып, төл дүниемізді кеңінен насихаттау болып табылады. Кеш барысында Кенжебай Шалұлы әсерлі әңгімелер айтып, әуезді әндер орындап көрерменнің мол ықыласына бөленді. Жас талантты Мейрамбай Дінмұхамед және Қалмахан Ерсұлтан домбырамен күй орындап қошеметке ие болса кітапхананың тұрақты оқырманы «Ғибрат» клубының мүшесі Бижанов Жәнібек әннен шашу шашты. Экран арқылы ҚР Еңбек сіңірген мәдениет қайраткері Кенжебай Шалұлының ұлағатты ұстазы Қайрат Байбосыновтың арнайы аудиоқұттықтауы көрермен назарына ұсынылды. Шымкент қалалық Әл-фараби атындағы ғылыми әмбебап кітапхана қызметкері Әйгерім Төребайқызы әсем әннен тарту жасап көрерменге өнерден сый ұсынды. Кеш өте мәнді мазмұнды өрбіді. Кешті «Тифлология» бөлім меңгерушісі Ербек Бакиев жүргізді. Көнекөз қариялар жастарға батасын беріп домбыраның киесін танытты. Жиылған жұртшылық естелік суретке түсіп көңілді тарасты. Жергілікті телеарна тілшілері келіп ақпараттық қолдау танытты.

Тарихқа тағзым – танымға жол

Шымкент қалалық арнайы кітапханасының оқырмандары үшін Шымкент қаласындағы «Қазына» этно-тарихи кешенінде орналасқан тарихи кесенелерге танымдық саяхат ұйымдастырылды.

Саяхат барысында оқырмандар өңірдің тарихи-мәдени мұраларымен танысып, қазақ халқының бай тарихы мен рухани құндылықтары туралы мол мағлұмат алды. Сонымен қатар, тарихи кесенелердің ерекшеліктері, олардың ел тарихындағы орны мен маңызы жайында қызықты ақпараттар берілді.

Іс-шараның басты мақсаты – оқырмандардың тарихи санасын қалыптастыру, ұлттық құндылықтарды дәріптеу және мәдени мұраларға деген құрметті арттыру.

Танымдық саяхат қатысушылардың қызығушылығын оятып, туған өлкенің тарихын тереңірек танып-білуге мүмкіндік берді. Мұндай шаралар жас ұрпақтың отансүйгіштік сезімін нығайтып, тарихи-мәдени ескерткіштерді қастерлеуге тәрбиелейді. «Қазына» этно-тарихи кешені аумағында өңірдегі тарихи-мәдени ескерткіштердің макеттері мен кесенелері шоғырланған танымдық орын ретінде танымал.

«Шымкент – ежелгі тарих пен заманауи дамудың тоғысқан орны»

19 маусым – Шымкент қаласы күніне орай Шымкент қалалық арнайы кітапханада «Шымкент – ежелгі тарих пен заманауи дамудың тоғысқан орны» атты мерекелік мәдени-танымдық шара ұйымдастырылды.

Іс-шараның мақсаты – оқырмандарға Шымкент қаласының бай тарихи мұрасы, рухани құндылықтары мен бүгінгі қарқынды дамуы туралы жан-жақты мағлұмат беру, туған қалаға деген сүйіспеншілік пен мақтаныш сезімін қалыптастыру. Меркелік кешке Шымкент қалалық Қазақ зағиптар қоғамының жанынан ашылған «Көңілашар» қоғам мүшелерінен құралған өнерпаздар ұйымының тұсауы кесілді. Өнерпаздар өз өнерлерін жанды дауыста паш етті.

Шара барысында Шымкенттің көне тарихы, мәдениеті, көрікті орындары, әлеуметтік-экономикалық жетістіктері мен заманауи келбеті туралы кеңінен ақпарат беріліп, кітап көрмесі ұйымдастырылды. Қала тарихына арналған әдебиеттерге библиографиялық шолу жасалып, танымдық сұрақ-жауап өтті.

Жазға жоспар құрдың ба?

«Тағдырластар» клубының кездесуі

3-ші маусым күні Шымкент қалалық арнайы кітапханада «Жазға жоспар құрдың ба?» атты «Тағдырластар» клубының маусым айына арналған кезекті кездесуі өтті. Кешті Ербек Бакиев жүргізді. Алдымен маусым айында туған, туған күн иелерін құттықтап, сый-сияпаттар табыс етті. Түрлі сұрақтар қойылып, қызықты ойындар ұйымдастырылды. Камал Тоғжан, Көпжасар Ұлбике жырдан шашу шашып, көпті поэзия биігіне жетеледі. Ақтөбе облысы, Шалқар ауданынан арнайы келген Аманжол Мұқамбетказиев пен Айкөркем Қарабаева және Қасымхан Тәңірбергенов, Алладин Талиев, Сұлтан Маннатов, Ернар Бердалиевтер кештің көркін әсем әнмен кіргізді.

Жүргізуші қатысушыларға әдеби сұрақтар қойып, түрлі кітаптарға тоқталып өтті. Әрбір келуші оқырман шара барысында жазға арналған жоспарларымен бөлісті. Экран арқылы ақпараттық танымдық арнайы бейнематериалдар көрсетілді. Кеш соңында жиналған жастар топтасып естелік суретке түсіп көңілді тарасты.