«Жігерлі жанмен жүздесу»

2026 жылдың 30 қыркүйек күні Шымкент қалалық арнайы кітапханасында өнерге құштар жандарға қолдау көрсетіп, шығармашылық жолына бағыт-бағдар беріп жүрген ұстаз, өнер жанашыры Тамара Камалханқызымен және өнерлі жастарымызды Ресей мемлекетінде өткен халықаралық деңгейдегі үлкен фестиваль байқауларға қатысуына мұрындық болған, қолдап мүмкіндік жасаған сол кездегі «Үміт» мектеп интернатының директоры Нургазинова Биғайша Таутиевнамен «Жігерлі жанмен жүздесу» атты кездесу кеш болып өтті. Шараға «Сәт» триосы және республикалық, халықаралық деңгейдегі байқаулар мен өнер додаларында өнер көрсетіп жүрген зағип өнерпаздар қатысты. Олар өздерінің шығармашылық жолы, өнердегі жетістіктері мен ұстаздан алған тәлім-тәрбиесі туралы ой бөлісті. Кездесу барысында өнерпаздардың сахнадағы алғашқы қадамдары, байқаулардағы жетістіктері, шығармашылық ізденістері сөз болып, Тамара Камалханқызының шәкірттеріне берген бағыт-бағдары мен ұстаздық еңбегі кеңінен әңгімеленді. Кеш барысында «Сәт» триосының және талантты өнерпаздардың орындауындағы әндер көрермендерге ұсынылып, шығармашылық кездесу әсерлі музыкалық бағдарламаға ұласты.

«Заң және тәртіп – қауіпсіз қоғам кепілі»

Шымкент қалалық көзі көрмейтін және әлсіз көретін азаматтарға арналған арнайы кітапханасында танымдық-патриоттық іс-шара ұйымдастырылды.

Іс-шараға Шымкент қаласы Полиция департаменті Еңбекші ауданы Полиция басқармасының қызметкерлері қатысып, құқық бұзушылықтардың алдын алу, қоғамдық тәртіпті сақтау, азаматтардың құқықтары мен қауіпсіздігін қамтамасыз ету бағытындағы қызметтері туралы ақпарат берді.

Кездесу барысында қатысушыларға заңды сақтау, құқықтық сауаттылықты арттыру, қоғамдық тәртіпті сақтау және қауіпсіз қоғам қалыптастырудағы әр азаматтың жауапкершілігі туралы түсіндірме жұмыстары жүргізілді. Полиция қызметкерлерімен еркін форматта сұхбат ұйымдастырылып, қатысушылар өздерін қызықтырған сұрақтарын қойды.

Іс-шараның мазмұнын толықтыру мақсатында тақырыпқа сай көрініс қойылып, құқық пен тәртіптің қоғамдағы маңызын ашатын сахналық қойылым ұсынылды. Сонымен қатар, патриоттық әндер орындалып, елге, Отанға деген сүйіспеншілікті арттыруға бағытталған рухани-мәдени бөлім ұйымдастырылды.

«Күз бен біз» «Тағдырластар» клубы

Шымкент қалалық көзі көрмейтін және әлсіз көретін азаматтарға арналған арнайы кітапханада «Тағдырластар» клубының кезекті кездесуі «Күз бен біз» атты тақырыпта өтті. Кешті клуб жетекшісі Ербек Бакиев жүргізді. Алдымен қыркүйек айында туған туған күн иелерін құттықтап, арнайы марапаттар табысталды. Түрлі әндер айтылып, өлеңдер оқылып, дауысты жұмбақтар жасырылып, ойындар ұйымдастырылды. Белсенді қатысқан жастар түрлі сыйлықтарға ие болды. Шымкент қалалық «Әділет» партиясы филиалының орынбасары Байқонысов Ербол Рәбілұлы және «Әділет» партиясының Еңбекші аудандық филиалының атқарушы хатшысы Мақсат Жанұзақұлы арнайы келіп оқырмандармен кездесіп, партия атынан арнайы алғысын білдіріп сый құрмет көрсетті. Кешті біршама телеарналар түсіріп ақпараттық қолдау танытты. Кеш барысында Отырар ауданы Шәуілдірден Садықова Гүлзира келіп жырдан шашу шашты. Кеш соңында естелік суретке түсіп көңілді тарасты.

«Әділетті қоғамға – шыншыл сөз»

Шымкент қалалық көзі көрмейтін және әлсіз көретін азаматтарға арналған арнайы кітапханада ұжым арасында Қазақстан Республикасының Президенті Қасым-Жомарт Кемелұлы Тоқаевтың әр жылдары айтқан қазақ және орыс тілдеріндегі таңдаулы сөздері топтастырылған «Әділетті қоғамға – шыншыл сөз» атты кітапты талқылауға арналған дөңгелек үстел өткізілді.

Іс-шараның сөз басын кітапхана директоры Ахат Қанатұлы бастап, кітаптың мазмұнына тоқталып, ондағы ой-тұжырымдардың қоғамдағы әділеттілік, жауапкершілік, заң мен тәртіп, еңбекқорлық және адамгершілік құндылықтарымен сабақтастығын атап өтті.

Дөңгелек үстел барысында кітапхана қызметкерлері өз ой-пікірлерін ортаға салып, кітапта қамтылған өзекті мәселелер төңірегінде пікір алмасты. Қатысушылар арасында сұрақ-жауап ұйымдастырылып, әріптестер өздерін қызықтырған сауалдарын қойып, тұшымды жауаптар алды.

Кездесу соңында қатысушылар кітаптағы тағылымды ойлардың күнделікті қызметте жауапкершілікпен еңбек етуге, ел дамуына үлес қосуға және қоғамдағы өзара құрмет пен сенімді нығайтуға бағыт беретінін атап өтті.

«ҒАСЫР ӘЖЕЛЕР» ТОБЫ ҚОНАҚТА

Шымкент қалалық көзі көрмейтін және әлсіз көретін азаматтарға арналған арнайы кітапханасы Стационардан тыс қызмет көрсету секторының және «Ғибрат» мәдени-демалыс клубының ұйымдастыруымен тағылымы мол, тәрбиелік мәні зор кездесу өтті.Кітапханамызға Қаратау аудандық ардагерлер жанынан құрылған алты әжеден құралған «Ғасыр әжелер» тобы арнайы қонаққа келді. Әжелеріміз өздерінің өнегелі өмір жолдарынан сыр шертіп, ақыл-кеңестерімен бөлісіп, жүрекжарды тілектерін жеткізді. Кездесу барысында әсем әндер шырқалып, жылы әңгіме өрбіді.Кездесу соңында ардақты қонақтарға арнайы кітапхана директоры атынан Алғыс хат табысталып, сондай-ақ «Ғибрат» мәдени-демалыс клубының атынан арнайы сыйлықтар тарту етіліп, ақ жаулықты әжелерге құрмет көрсетілді.